Доколку мешовитата македонско-бугарска Комисија за историски прашања продолжи да инсистира во нејзината работа да се утврди и да се напише на документ дека Гоце Делчев бил Бугарин или Македонец, нема да имаме решение, изјави македонскиот член на Комисијата, Драги Георгиев при гостување во емисијата „Уште од денот“ на Бугарската национална телевизија.
„Гоце Делчев е многу чувствителна тема и да се одговори на тоа дали бил Бугарин или Македонец и да се бара тоа од нашата комисија, јас сметам дека е апсолутно несоодветно. Не е работа на комисијата да каже што е Гоце Делчев“, изјави Георгиев.
Според него, во тоа време не станува збор за „еден црно-бел свет“ и не постоела јасна поделеност на бугарска или македонска свест, бидејќи „се е испреплетено и сите случувања во тој период се хаотични“. Бугарскиот член на Комисијата, Ангел Димитров гостувајќи во истата емисија, пак, потенцира дека треба да се утврди што бил Гоце Делчев.
„Ако не се знае што е човекот, нема да можеме точно да го определиме неговото дело. Освен тоа нема што ние да кажуваме. Гоце Делчев сам кажал што е, тоа го кажале неговото семејство, неговите другари и соборци. Тие јасно кажале што се“, истакна Димитров.
Инаку, како што најавија Георгиев и Димитров, прашањето за евентуално заедничко чествување на Гоце Делчев е тема на денешната средба на членовите Комисијата, откако во текот на вчерашниот ден тие расправале за средновековната историја и периодот на Османлиската Империја и за учебниците по историја, при што, како што нагласија, не постигнат напредок.
Досега е постигнат мал напредок само во делот на средновековната историја, додека ставовите по однос делото на Гоце Делчев остануваат дијаметрално спротивставени. По изјавите од бугарските политичари со кои се проблематизира македонскиот јазик идентитетот на Гоце Делчев и се упатуваа одредени условувања преку Рамковна позиција на бугарската влада, а потоа и со Декларација на Парламентот, премиерот Заев рече дека во 21 век не се преговара за идентитет и се надева оти сите недоразбирања ќе се решеваат преку дијалог.
Претседавачот на мешовитата македонско бугарска комисија експерти која ги води преговорите околу историските моменти, Драги Ѓорѓиев рече дека преговорите во Комисијата ќе продолжат без разлика на она што се случува во политиката.
-Ние сме академска комисија и нашата работа ќе продолжи беа разлика што се случува во политиката. Ние разговараме на три состаноци, а штом разговараме има простор за наоѓање решение со добра волја од двете страни, вели Ѓорѓиев.