Полициски службеници од Полициска станица Центар при СВР Скопје денеска (22.07.2022) го привеле С.А. (48) од Скопје, постапувајќи по пријави од граѓани примени во 07.25 и 07.40 часот, според кои во катна гаража во близина на трговски центар на подрачјето на Центар било извршено оштетување на нивните патнички возила, информираа од  полицијата.

По оштетувањето на автомобилите во монтажната катна гаража зад трговскиот центар во „Буњаковец“, градоначалникот на општина Центар, Горан Герасимовски, разговараше со Игор Стаменковски, командир на полицијата.

„Сликите од утринава со искршени прозорци и шофершајбни во катната гаража кај трговскиот центар ‘Буњаковец’ навистина ги вознемири центарци. Разговарав и со командирот на полициската станица  Центар, кој ме информираше дека се оштетени 18 возила и веќе имаат приведено едно лице, кое во моментов се наоѓа во полициска станица“, изјави градоначалникот Герасимовски.
Изминатиот период, Герасимовски заедно со општинските служби и припадници на МВР имаше неколку средби со граѓани во повеќе центарски населби, на кои се разговараше и за воведување на тн. маалски позорникари, со цел зачувување на мирот и зголемување на степенот на безбедност во сите маала.
Градоначалникот Герасимовски и општина Центар апелираат до граѓаните, доколку забележат сомнителни дејства во околината на нивните домови и истите да ги пријават до МВР со повик на бројот 192.