Европската Унија мора да покаже единство и сила во одговорот на тарифите наметнати од Соединетите Држави, порачаа германските министри за економија и финансии.
„Силата на Европа е нашата сила. Ние го имаме најголемиот единствен пазар во светот и мора да го искористиме тоа“, рече министерот за економија Роберт Хабек, пренесе Ројтерс.
Министерот за финансии Јорг Кукис, исто така, ја истакна потребата од решителен одговор на ЕУ, но во исто време истакна дека блокот е отворен за преговори.
„Би било наивно да се мисли дека работите ќе се подобрат ако само седиме и гледаме. Очекувам силен одговор од Европската Унија“, изјави Кукис за Би-би-си, додавајќи дека „вратата за договор останува отворена“.
Американскиот претседател Доналд Трамп во средата воведе одмазднички тарифи од 20 отсто за стоките од ЕУ увезени во САД.
Во меѓувреме и претседателката на Европската комисија Урсула фон дер Лајен остро ги критикуваше новите царини, предупредувајќи дека тие ќе имаат „катастрофални последици“ за економијата и за милиони луѓе ширум светот.
Таа најави дека ЕУ веќе подготвува контрамерки и го истакна европското единство и одлучност, пренесува Танјуг.
Исто така, претседателот на Европскиот совет, Антонио Коста, денеска изјави дека царините наметнати од САД треба да ја поттикнат Европа да постигне трговски договори со други партнери ширум светот.