Во гевгелиската болница, не стивнуваат скандалите. Оваа фотографија е направена во операционата сала во болницата. Додека пациентот под дејство на анестезија и со отворен стомак, во локва крв лежи на хируршкиот стол, целата медицинска екипа прави селфи. Фотографијата потоа е ставена на Фејсбук профилот на една од докторките, каде што луѓето ја поздравуваат медицинската екипа без никој да забележи дека ваква фотографија не смее да се објавува јавно и дека со тоа е нарушена приватноста на пациентот и Законот за правата на пациентите.
Директорот Среќко Јованов беше затекнат од ваквата ситуација, рече дека не знае за што се работи, но најави дека ќе преземе соодветни мерки. Дополнително, од болницата информираа дека докторката што ја поставила фотографијата на Фејсбук е ангажирана од КАРИЛ како анестезиолог бидејќи таму веќе немаат анестезиолози.
Пред извесно време родилка и нејзиното бебе починаа во гевгелиската болница, а на двајцата анестезиолози им беа одземени лиценците за работа бидејќи биле пијани за време на операцијата.
Инаку, за слична ваква фотографија во 2010 година, лекарка од Ургентен центар во Скопје беше суспендирана од работа бидејќи се сликата со полугола пациентка во позадина за време на новогодишната ноќ.