Новак Ѓоковиќ објави крај на сезоната. По прегледите во Торонто и неколкудневните консултации со медицински стручњаци, српскиот тенисер реши да се повлече од АТП турот на одреден период за рехабилитација на повредениот лакт што го мачи веќе подолго време и го принуди да го предаде четвртфиналниот дуел на Вимблдон против Томаш Бердих.
„Го оставам рекетот на неколку месеци по што се надевам дека ќе можам нормално да тренирам. Вимблдон беше мој најтежок турнир поради интензитетот на болки што го имав. Консултирав многу стручњаци и се согласив дека ми е потребен одмор“, порача Ѓоковиќ на прес-конференција во Белград што траеше 45 минути.
Еден од најдобрите светски тенисери во моментот потенцира дека воопшто не му било лесно да донесе одлука за пауза што за првпат во неговата кариера ќе трае околу шест месеци. Добра вест во целата ситуација е што операција, барем засега, не е потребна и покрај сериозноста на повредата што е настаната од преоптоварување.
„Ова е тип на повреда е карактеристична за тенисер и бејзбол играчи поради механиката на движења и за неа не помага ништо што е моментално. Мора да дозволите процесот на рехабилитација да оди по природен пат. Никогаш досега не сум се оперирал, а не би сакал ниту некогаш да се оперирам. Период ќе го искористам за користење на други методи за враќање на тениските терени што е можно поскоро, но и за посветување на семејството. Шест месеци се доволен приод за опоравување и од јануари да заиграм на највисоко ниво“, додаде тенисерот кој од понеделник излегува од топ 4 на АТП ранг листата по пауза од десет години.
Ѓоковиќ, кој за еден месец очекува по вторпат да стане татко, откри дека ќе продолжи да соработува со Агаси. Дел од останатите членови во стручниот штаб остануваат, дел ќе треба да се прецизираат во наредниот период.
„Агаси прифати да биде со мене во овој период за што сум му благодарен. Постојано ќе бидеме во контакт и со нетрпение ќе чекам да дојде време за повторно да минуваме време на терен, да влеземе во суштина на мојата игра и да ја унапредиме. Кондиционен тренер сè уште немам, Марио Анчиќ е приоритет за втор тренер меѓутоа конечен договор не е постигнат од причина што тој моментно е во друга сфера. Во случај на негативен одговор од него, имам неколку други опции“, појасни првиот Ѓоковиќ.