Во големи израелски напади врз Појасот Газа, според палестински извори, загинаа најмалку 330 луѓе.
Околу два месеца по почетокот на прекинот на огнот во Појасот Газа, израелската армија продолжи со големите напади врз исламистичката терористичка организација Хамас во крајбрежниот регион.
Во договор со политичкото раководство, армијата во моментов врши опсежни напади врз позициите на Хамас, соопшти израелската војска во текот на ноќта. Според еден воен портпарол, нападите биле насочени кон команданти на Хамас на средно раководно ниво и кон инфраструктура.
Во нападите, според Министерството за здравство под контрола на Хамас, загинале најмалку 330 луѓе.
Израелскиот премиер Бенјамин Нетанјаху соопшти дека ѝ наредил на војската повторно да го нападне Хамас во Појасот Газа: „Израел отсега ќе дејствува против Хамас со зголемена воена сила“. Нападите, според Нетанјаху, се реакција на одбивањето на Хамас да ослободи повеќе заложници и отфрлањето на сите предлози за траен прекин на огнот.
Портпарол на американската влада рече дека Израел се консултирал со САД пред новите напади на Појасот Газа. Тој го потврди ова во емисија на американскиот канал Фокс Њус.
Претставник на Хамас за новинската агенција Ројтерс изјави дека Израел со последните напади во Појасот Газа еднострано го прекинал договорот за прекин на огнот.
Во јануари беше договорен прекин на огнот меѓу Израел и Хамас, кој првично траеше шест недели. Досега двете страни не можеа да се договорат за условите за продолжување на прекинот на огнот.
Израел се закани дека ќе ја продолжи војната доколку Хамас не ослободи уште израелски заложници.