Едно непишано правило во спортот гласи „полесно е да се освои одошто да се одбрани“. Вардар е актуелен владетел во ракометната Лига на шампиони и продолжи како што тргна многу веројатно е дека и ќе остане на континенталниот клупски трон. Европскиот првак не знае за пораз во 13 меча во серија, попладнево ја запиша седмата победа во групата А и се бетонира на челната позиција на табелата. „Црвено-црната“ машина го сомле и Рајн Некар Левен со 30:26 (полувреме 17:13) за петти триумф во меѓусебните дуели или вкупно 11 во пресметките со членови на бундеслигашкото друштво.
„Оваа победа е значајна за нас. Забележана е против шампион на Бундеслигата што важи за најдобра. Рајн Некар е екипа која одлично напаѓа со седум ракометари и тоа веројатно го прави најдобро во светот. Добро почнавме и успеавме да најдеме начин за адекватно да парираме. Напаѓачки бевме подобри одошто беше случај против Барселона. Кога против себе имате тим што игра квалитетна одбрана и има страшен контранапад, мора да бидете на ниво. Ние денеска бевме и затоа успеавме“, истакна Раул Гонзалез, тренер на Вардар, по средбата.
Вардарци веќе 13 меча не знаат за пораз во елитното натпреварување на ЕХФ. Против Рајн Некар почнаа како што посакуваа, како што се договорија и притоа не дозволија ништо да ги наруши во победничките намери. Уште во првата половина од воведното полувреме покажаа кој е кој во „Јане Сандански“ и ритамот што го наметнаа го одржија до крај. Одлични во одбрана, ефикасни во напад, а ветар во грб им беше и Арпад Штербик кој со своите интервенции имаше голема улога во откажувањето на бундеслигашот.
„За одличен натпревар потребен е одличен противник. Ние го имавме во тимот на Рајн Некар кој игра ракомет за око. Чувството е убаво да се гледаат Германците како играат. Врз основа на тоа добро се подготвивме. Добро ги затворивме нивните напади „седум на шест“ уште од почеток. Опасна е таквата игра, но успеавме да пресликаме на терен се што се бараше од нас“, посочи вардаровиот Хрват, Иван Карачиќ.
Борозан беше лидер на вардаровиот напад со седум погодоци. Најголема реализаторска поддршка имаше од Иван Чупиќ кој мечот со заврши со шест гола, еден повеќе од летонскиот џин, Даинис Криштопанс. Најефикасни на спротивната страна беа Шмит, кој не се наигра во Скопје, и Баена, стрелци по пет гола за германскиот претставник.
Вардар и Рајн Некар Левен веќе наредниот викенд ги очекува ново соочување во Манхајм.
Вардар – Рајн Некар Левен 30:26 (17:13)
Сала: СЦ „Јане Сандански“. Гледачи: 5.500. Судии: Сорин Лаурентиу Дину и Константин Дин (двајцата од Романија).
Вардар: Штербик, Милиќ, Стоилов 3, Недановски, Поповски, Криштопанс 5, Македа, Карачиќ 3, Абутовиќ, Кањелјас 1, Чупиќ 6, Дибиров 3, Шишкарев 1, Борозан 7, Војводиќ, Марсениќ 1. Тренер: Раул Гонзалез.
Седмерци: 4/6. Исклучувања: 8 минути.
Рајн Некар Левен: Апелгрин, Палицка, Шмит 5, Близнак, Сигурдсон 4, Радивоевиќ 4, Баена 5, Толбринг 1, Рниќ, Менсах 1, Пекелер 2, Гроцки, Рајнкинг 2, Талески, Гвардиола, Петерсон 2. Тренер: Николај Јакобсен.
Седмерци: 2/3. Исклучувања: 8 минути.