Со грчки знамиња и знамиња со сонцето од Вергина и слогани со пораки „Македонија била, е и ќе биде грчка“, „Тргнете ги рацете од Македонија“, „Името е нашата душа“ илјадници Грци се собраа во центарот на Солун на протестот за одбрана на името „Македонија“.
Собирот започна околу 14 часот по локално време.
Говорниците се фокусираа на пораките под кои се одвиваше протестот. Дел од организаторите рекоа дека оној што ќе го даде името Македонија, ќе биде национален предавник.
Протестот го поддржаа и митрополити од Северна Грција, а свое обраќање имаше и солунскиот митрополит Антимос, јави МИА.
Паралелно, левичарски и анархистички организации одржаа контра протест, но со многу помал одзив.
Пораките што тие ги упатуваат преку нивните плакати се дека тие се „против секаков национализам, наша татковина е целата земја“ и „Ни капка крв за имиња и меѓу државни конфликти“.