На возилата ќе се лепат налепници при технички преглед со цел да се утврди кое возило колку загадува и по потреба да биде исклучен од сообраќајот.
Ваквата мерка ја најави градоначалникот на град Скопје, Петре Шилегов по средбата со градоначалниците на скопските општини, министерот за животна средина и преставничката на Програмата за развој при Обединетите нации на која се разговараше за мерките за намалување на загаденоста на воздухот.
„На технички преглед се оди секоја година, и сега некаде се мери количината на издувни гасови, а некаде не. Со ова сакаме тоа да биде задолжително и врз основа на тоа возилото да се категоризира и да се мапира…да добијат соодветна еко налепница, која ќе има соодветна боја, за да можам како градоначалник административно да забранам движење во одреден период на оние возила што најмногу загадуваат, на пример оние со црвена налепница“, изјави Шилегов.
Шилегов надополни дека град Скопје и МВР подготвуваат законски измени со кои што при технички преглед на возилата, ќе се мери количеството и составот на издувните гасови што ги испуштаат возила и врз основа на тој параметар ќе добијат соодветна еколошка налепница која ќе покажува кој автомобил колку придонесува во загадувањето.
Како што појасни градоначалникот на Скопје, анализата и категоризацијата на возилата по испуштањето на штетните гасови се прави согласно правилата на Европската комисија.
Шилегов напомена дека очекувањата се до крајот на 2017 година да се донесат потребните законски измени, а до крајот на наредната година да бидат мапирани и обележани сите возила.