Градоначалникот на општина Аеродром Златко Марин соопшти дека издал решение за запирање на градбата на зградата кај Мајчин домво траење од 15 дена, поради неправилности констатирани од инспектор.
Тој информира дека инспекторот денеска излегол на терен и направил записник и го изготвил решението.
-Градбата е стопирана, влегуваме во барање решение низ дискусија, ги преземам сите можни мерки и напори со сите засегнати страни да најдеме начин трајно да го заштитиме плацот пред Мајчин дом, изјави Марин, на прес конференцијата денеска.
Тој додаде дека презема иницијатива за решавање на проблемот со разговор со граѓаните, со инвеститорот и со Градот Скопје и оти во петок закажал вонредна седница на Советот на општина Аеродром, на која ги повикува да присуствуваат граѓанските организации и сите засегнати граѓани да присуствуваат на седницата и „да бидат дел од процесот“, вели тој.
Вчера жители на населбата Аеродром одржаа протест и го блокираа сообраќајот на булеварот Јане Сандански во знак на револт бидејќи продолжиле градежните работи на објектот кај „Мајчин дом“ и покрај ветувањата од градоначалникот дека тоа нема да се дозволи.
Жителите велат дека иако градоначалникот Златко Марин во предизборието им ветувал дека доколку биде избран ќе го стопира овој проект, тоа не се случило и продолжило уништувањето на зеленилото.
Вчера Марин ги образложи причините порад кои не може да се запре градбата, истакнувајќи дека ќе се чека одлуката на Уставниот суд каде се поднесени претставки.
На социјалните мрежи и денеска има повици за протестите, откако жители на Аеродром споделуваат видеа за кои велат дека инвеститрот и утринава продолжил со градежните активности.