Граѓанската иницијатива 5 до 12 денеска се сретна со Мила Царовска, министерка за труд и социјална политика.
Како што соопштуваат од Министерството за труд и социјална политика, од средбата произлегле конкретни барања кои веднаш може да бидат имплементирани, додека за останатите ќе треба да се направат анализи на буџетските импликации, а потоа да бидат преточени во законски измени.
Претставниците на граѓанската иницијатива и Царовска се договориле да се формира работна група од претставници на министерството, на иницијативата, на Ресурсен центар, Советот на национални организации, претставник на Координативното тело за изедначување на правата на лицата со попреченост и Хелсиншкиот Комитет. Мониторинг на целиот процес ќе биде повикан Народниот правобранител.
Од Министерството информираат дека по извршените анализи во работната група ќе бидат ставени неколку предлози.
- Укинување на границата од 26 години за користење на правото за скратено работно време на родителите кои имаат деца со попреченост;
- Ќе се разгледа воведениот материјален цензус за користење на правата на помош и нега, мобилност , слепило и глувост;
- Ќе се разгледа можноста за поголема професионализација на првостепената комисија за нега и помош од друго лица, истата технички и кадровски да се доекипира, и истата да може да ги спроведува увидите во домот на корисникот. Исто така, Конзилијарните комисии од прв степен за ова право да бидат укинати за да се намалат административните процедури за оваа категорија на граѓани;
- Ќе се преоценат програмите за работа на дневните центри за деца со попреченост на територија на Република Македонија. Од страна на МТСП веќе се побарани податоците од сите центри во државата, со поддршка на УНИЦЕФ. Изготвена е анализа за алтернативните форми на згрижување, и согласно со препораките и забелешките во наредниот период ќе се преземат соодветни чекори во насока на доекипирање на центрите, овозможување на соодветни едукации и слично.
- Ќе се провери неспровдувањето на Законот за Националната база на податоци за лица со инвалидност донесен во август 2015 година; односно за почеток е договорено са се создаде регистар на лица со попреченост преку вмрежување на податоци од постојните системи, како што е Министерството за здравство, Фондот за здравствено осигурување, Фондот за пензиско и инвалидско осигирување, Агенцијата за вработување и ресурсниот центар на родители кои што имаат деца со посебни потреби,
- Со МИОА ќе се провери до каде се постапките веб страните на сите државни органи да бидат пристапни за лицата со попреченост.
Граѓанската иницијатива најави дека од денеска до 22 повторно ќе кампуваат во паркот Жена Борец, спроти Собранието.