Лидерот на СДСМ, Зоран Заев придружен од музичарите Златко Ориѓански и Бени Шаќири, новинарот Томислав Кежаровски, актерката Ирена Ристиќ, новинарот Атанас Костовски, членката на Сојузот на борците на Македонија, Вера Бунтеска и активистот на Твитер, Влатко Васиљ, денеска го најавија граѓанскиот марш на 11.Октомври под мотото „Борбата продолжува, гласот победува“.
Без разлика на партиската припадност, верската или етничката, лидерот на СДСМ Зоран Заев, ги повика граѓаните на маршот кој ќе започне во 14 часот, на крстосницата на булеварот Партизански одреди и улицата Рузвелтова.
– Се огласуваме со слободарска порака, склучуваме сојуз за да ја вратиме слободата. За се избориме за достоинствена држава, за повисоки плати, за правда и правичност, за млади кои сакаат да останат во својата земја. Денеска нашето оружје е нашиот глас, да кажеме „да“ за животот, а „не“ за режимот, порача Заев.
Ристиќ во својот повик до граѓаните, повика на масовност.
– Крајно време е да покажеме подготвеност да ги преземеме во свои раце окупираните институции…да покажеме подготвеност да обезбедиме просперитетна држава за нашите поколенија, рече Ристиќ.
Ориѓански пак, смета дека Македонија ако сака да преживее мора да си ги собере своите надарени поединци, а интелигенцијата да го поведе народот.
– Го допревме дното. Никогаш не сум верувал дека во ова модерно време додека другите држави грабаат напред ние ќе се бориме да преживееме. Сите прогресивни сили да се здружат во едно за да се избориме со режимот, повика и музичарот Бени Шакири.
Костовски, кој во јавноста важи за најубавит коментаторски глас во спортот, рече дека неговата генерација марширала со Шарената револуција, и дека во вторник ќе маршира за правда и мир.
Бунтеска од Сојузот на борци, исто така се приклучи во оваа иницијатива, повикувајќи дека неопходно е да живееме во држава во која ќе има правда и каде граѓаните со сопствени сили ги решаваат проблемите.
Кежаровски порача дека и покрај тоа што му е направено и се уште му се прави, тој нема да дозволи некој да биде господар на неговиот ум.
„Смело напред“ повика новинарот Томислав Кежаровски.