Кои реформски зафати треба да ги преземе новата Влада во првите шест месеци. На оваа тема на трибина-консултација организирана од кабинетот на лидерот на СДСМ Зоран Заев, со граѓанскиот сектор говореа повеќе експерти од областа на економијата, судството, човековите права, образование, здравство и младинскиот сектор.
Во делот на финансиите зборуваше Петар Гошев поранешен Гувернер на НБРМ, од областа на судството предлози даваше Светомир Шкариќ, професор по Уставно право, за човекови права Уранија Пировска, извршна директорка на Хелсиншки комитет, образование Ирена Стефоска, професорка на Институтот за национална историја, за здравството Менче Атанасова Точи новинарка и Дона Костуранова, младински активист.
Тие дадоа свои предлози и беа предложени повеќе мерки во овие области кои треба да бидат спроведени во првите шест месеци од функционирањето на новата Влада.
Лидерот на СДСМ Зоран Заев истакна дека како партија се отворени за предлозите и сугестиите на граѓанскиот сектор и оти во Македонија мора да се случат промени кои ќе се фокусираат и ќе го издигнат граѓанинот над се.
Според Заев, потребни се реформи во правосудниот систем со кои судството ќе стане независно, а како што посочи, поддршка даваат и на Специјалното јавно обвинителство бидејќи законот мора да важи за сите поеднакво.
Работниците, како што рече, немаат никакви права, а куповната моќ е намалена поради што потребно да се преземат чекори за да се зголеми просечната плата и животниот стандард на граѓаните. Заев додаде дека треба да се помагаат и домашните компании, а не само странските инвеститори да имаат бенефиците кога инвестираат во државата. Промени ќе се случат и во здравството, а една од мерките да се стимулираат лекарите специјалисти од терцијално здравство е и двојно зголемување на нивните плати.
Според Заев, потребни се и низа мерки за да се задржат младите да останат во државата и тие да не ја гледаат иднината само во јавната администрација.