Еко активистот и актуелен пратеник од редовите на политичката партија „Можеме“ е новиот градоначалник на Загреб кој со над 65 отсто од изборните гласовите го порази противкандидатот, музичарот и ТВ водител Мирослав Шкоро од партијата „Татковинско движење“.

Во првото интервју по изборите, тој вели дека очекува цивилизиран пренос на власта во хрватската престолнина, која речиси 20 години беше во рацете на досегашниот градоначалник Милан Бандиќ. Најави реформи во градската управа и казни за сите што ќе се огрешат пред законот.

„Од сега нема веќе недопирливи. Ако јас лично погрешно го паркирам автомобилот, очекувам да ме казнат комуналните редари. Истото ќе важи и за мојата сопруга и моите најблиски соработници. Жителите на Загреб веднаш ќе ги почувствуваат промените“, рече Томашевиќ во интервју за хрвстски „Индекс“.

Најави оти ќе бидат отворени за консензус со сите политички чинители во градската самоуправа за да можат планираните проекти непрекинато да течат и после неговиот мандат, без разлика кој ќе биде на власт.  Се пожали на „валкана“ политичка кампања во пресрет на вториот изборен круг и најави тужби за клевета против Шкоро.

Победата на Томашевиќ ги зовре социјалните мрежи. Како што пишуваат хрватските медиуми, приврзаниците на десницата, Загреб го нарекуваат новиот Титоград.

Претседателот на Хрватска, Зоран Милановиќ, пак не е изненаден од изборните резултати. Тој одговарајќи на новинарски прашања, посочи дека во политиката „никој не е вечен“.

„Изборните резултати се предупредување за сите оние кои мислат дека позицијата во политиката е вечна. Ништо не трае вечно, уште помалку во политиката“, рече Милановиќ.

Инаку, Томашевиќ е активист уште од 16-годишна возраст, кога се приклучил на еколошката организација „Зелена акција“. Во 2003 година, станал потпретседател на Хрватската младинска мрежа, а во 2005 година член на Младинскиот совет во Владата на Република Хрватска.

Познат е и како промотер на големи еколошки проекти финансирани од фондовите на ЕУ, но и по својот активизам и борба против корупцијатa.

Томашевиќ е основач на зелената лево ориентирана партија „Загреб е наш!“ која беше најгласен критичар на политиките на градоначаникот Милан Бандиќ. Дел е и од политичката платформа и партија „Можеме“, основана во 2019 година, чии клучните вредности вклучуваат економска, социјална и родова еднаквост, намалување на зависноста од енергија и храна, независност на медиумите и поттикнување на иновациите, намалување на сивата економија, економска демократија, зајакнување на синдикалството и работничките права. Тој стана пратеник во 2020 година.

Ова е втор обид на Томашевиќ да седне на фотељата во градската самоуправа. На локалните избори во 2017 година освои едвај 3,94% од гласовите, но влезе во Собранието на Загреб, као еден од четворицата претставници на „Загреб е наш!“.

Уште едно изненадување на локалните избори во Хрватска е победата на научникот Ивица Пуљак, кандидат на партијата „Центар“ кој функцијата  градоначалник на Сплит  ја доби со близу 60 отсто од гласовите, наспроти неговиот противкандидат од владејачката партија ХТЗ, кој освои  40 проценти од изборните гласови.

„Центар“ е либерална партија, позната и како „Паметно“ која била основана во 2015 година како иницијатива „За паметни луѓе и паметен град“ чија основна цел била да се залага за одговорно и транспарентно управување со јавните ресурси и заштита на животната средина.

Билјана Божиновска