Грција е во состојба на зголемена безбедност, откако се соочи со наплив на илјадници мигранти кои се обидуваат да влезат од Турција, а локалното население стравува од нова криза.
„Ова е инвазија“, вели Јоргос Карампацакис, градоначалник на селото Марасиа, во близина на граничниот премин со Турција.
Повеќе од 13.000 мигранти се собраа на турската страна од реката Еврос која се протега, речиси, 200 километри долж границата меѓу Грција и Турција. Новиот бран на мигранти го разбуди стравот во ЕУ од реприза на бегалската криза од 2015 година, кога Грција стана влезна точка на милиони мигранти, повеќето бегалци од граѓанската војна во Сирија.
„Ова е тоа што се случи во 2015 година и сега се повторува. Илјадници на нашата граница, Бог нека ни е на помош“, вели 63 годишната Панајотија од пограничното село Кастаниес.
Турскиот претседател Реџеп Таип Ердоган го подигна влогот најавувајќи дека ќе дозволи на бегалците да минат кон Европа, во обид да изврши притисок врз ЕУ поради конфликтот во Сирија. Грчката полиција се обидува да одржи контрола врз ситуацијата и да ги одврати од намерата со користење на водени топови кон мигрантите. Дел од нив, пак, се обидуваат да ја препливаат пограничната река, други се обидуваат да се провлечат под заштитната ограда, додека бројот на оние кои чекаат на ничија земја се зголемува.
Грчкиот совет за безбедност одлучи да го подигне нивото на будност на границата кон Турција на максимум и да го запре приемот на нови барања за азил од лица кои илегално ја преминале границата.
Владиниот портпарол Стелиос Пецас вечерва ја критикуваше Турција.
„Турција, наместо да ги контролира мигрантите и шверцерите со луѓе, самата стана шверцер. Актуелната ситуација претставува активна, сериозна, вонредна и асиметрична закана за националната безбедност на Грција“, изјави Пецас и додаде дека Турција ги користи луѓето собрани на границата како „пиони“ со цел да изврши дипломатски притисок.
Во последните 24 часа, Грција блокираше околу 10.000 луѓе кои се обидоа да ја преминат границата. Само вчераутро во 6 часот околу 5,500 мигранти се обиделе илегално да ја преминат границата, а 60 од нив беа уапсени. Некои, сепак, успеале да ја минат реката Еврос и да се упатат кон внатрешноста на земјата.
На грчките острови, каде бесот поради постојаниот прилив на мигранти се заканува да ескалира, локални жители блокираа брод со 50 бегалци кој се обиде да се закотви. Извикувајќи „Вратете се во Турција“, бесни локални жители ги блокираа и претставниците на агенцијата на ОН за бегалци на островот Лезбос.
