Поранешниот премиер Никола Груевски на денешното рочиште за случајот „ТНТ“ за уривањето на Космос, во дополнението на воведните зборови, наведе дека овој процес како и сите останати против него, биле дел од политичкиот прогон на актуелната власт, која ги користела СЈО и судовите, јавува репортерот на НОВА, Бранислав Закев.
„Целта е да се наруши мојот углед и партијата што ја предводев да се уништи и на нејзино место да се инсталира друга политичка партија која ќе оствари други политички цели, пред се редефинирање на државата, што граѓаните веќе го гледаат и чувствуваат“, рече Груевски пред Судот.
Покрај него, дополнение на воведните зборови дадоа и поранешниот градоначалник на Општина Гази Баба, Тони Трајковски и екс министерот за транспорт и врски, Миле Јанакиески.
Тројцата наведоа дека во текот на судскиот процес ќе докажат дека Космос е класична дивоградба.
Дополнија и дека инвеститорот Фијат Цаноски, незаконски отстапил од првичниот план на градба и не изградил еден од трите предвидени катови за подземени гаражи.
Ова како што рекоа тројцата обвинети, било направено со цел Цаноски да оствари финансиска корист од околу 1.2 милиони евра.
Груевски наведе дека идејата на Цаноски била користејќи ја медиумската поврзаност и тогашното учество во политиката, да се обиде да ја оствари својата цел.
Тој наведе дека дури и да сакале да му помогнат на Цаноски и да влезат во некакви разговори или преговори околу градбата, не можеле да го направат тоа, бидејќи како тогашна владејачка гарнитура, постапувале исклучиво според закон и дека ако му помогнале, неминовно некој подоцна ќе морал да се соочи со кривична одговорност.
Груевски исто така потенцираше дека се врши огромен притисок врз судот со цел брзо да се завршат случаите во кои тој е обвинет, а за сметка на тоа се одложуваат други судски процеси.
„Кој го наредил тоа?“, праша Груевски, додавајќи дека ова се правело за да се оттргне вниманието на граѓаните од актуелните случувања поврзани со идентитетот, јазикот и други важни прашања.
А во контекст на ова, тој ја наведе и денешната одлука за слушање на бомбите во судницата, за која како што рече, е со цел да се замајува народот.
Фијат Цаноски во изјава за медиумите пред Судот, пак, рече дека не му се јасни тврдењата на обвинетите дека Космос бил дивоградба и дека изградил еден кат помалку за катни гаражи, бидејќи како што рече, тој имал валидна градежна дозвола за објектот.
Во моментов има пауза од 15 минути по која како што најави судијата Огнен Ставрев, рочиштето ќе продолжи со изведување на материјални докази.
Се очекува да се слушаат т.н бомби кои ги објавуваше СДСМ, поврзани со уривањето на Космос.