Поранешниот премиер и лидер на ВМРО-ДПМНЕ, Никола Груевски ги оцени како апсурдни и смешни двете нови истраги на Специјалното јавно обвинителство за стопираниот Попис на населението во 2011 година и за случајот „Актор“, за изградбата на автопатот Демир Капија – Смоквица.
Според Груевски истрагите се обиди на СЈО да го дефокусираат вниманието на јавноста од „крупните случувања за редефинирање на државата“.
-После моите реакции во средата не знаев дали за три дена, седум или десет дена ќе дојде ова што дојде. И еве дојде за седум дена ако добро можам да пресметам. Ништо не ме изненади. Првото е поврзано со пописот и навистина не знам дали наредната истрага ќе биде отворена за работи на пример дека некаде сум ручал и на сред ручање сум морал да станам и да заминам па сме направиле штета на буџетот што сме го платиле целото јадење. Во спроведувањето на пописот имаше државна комисија која што си ја туркаше својата работа. Цврсто верувам дека тоа го правеше одговорно и професионално. Сите ние други што сме во политика, веројатно и пошироко граѓаните следевме што се случува гледавме да не има некакви проблеми, но одлуките си ги носеа тие – органите кои што за неа беа назначени. Тие јавно објавија зошто дошло до прекин на пописот. Ова го сметам за уште еден чекор на СЈО во обид да го дефокусираат вниманието на јавноста од она што се случува во земјата, изјави Груевски одговарајќи на новинарски прашања по денешното рочиште за случајот „Тенк“ на СЈО.
Истрагата „Актор“, според Груевски била уште поапсурдна, бидејќи станувало збор за меѓународен тендер и комисија од составена од луѓе од различни министерства и седум набљудувачи од Европската комисија, од Европската инвестициона банка и од ЕБРД кои учествуваа во финансирањето проектот.
– Тие седум набљудувачи и таа комисија ја донеле одлуката, ја испратиле до Брисел, до Европската комисија е сега не знам колку денови недели ЕК го разгледувала тоа и на крај го вратила со одобрување дека може да се изврши тој избор што е извршен. И потпишан е договорот од претставници на Министерството за финансии и од претставникот, односно Амбасадорот на Европската Унија во Македонија. Значи тие се потписници на договорот со компанијата Актор. Потоа по извесен период, по некаква пријава или гласини Европската комисија отворила истрага за да провери дали се било во ред. Истрагата траела не знам колку време и според информациите што ги имам минатата година ревизорското тело на ЕК ги известило владините органи дека ја завршиле таа истрага и дека немаат никакви забелешки на постапката, изјави Груевски.