Во Кривичниот суд за денеска е закажано рочиште за предметот на СЈО „Насилство во општина Центар“ во кој обвинети се поранешниот премиер Никола Груевски, поранешниот министер за транспорт и врски Миле Јанакиески, пратеничката на ВМРО-ДПМНЕ Даниела Рангелова и уште девет лица.
Минатото рочиште од 13 март беше одложено, поради немање услови за одржување на судењето, откако обвинетиот Милан Андоновски не се појави во судницата поради боледување.
Тогаш обвинителката Фатиме Фетаи од СЈО побара притвор за Андоновски за да се обезбеди неговото присуство, бидејќи отсуствувал три пати досега, но судот го одби барањето како неосновано. Адвокатите приложија лекарско уверение дека е болен.
На претходните рочишта за овој предмет, вина за настаните пред општина Центар во јуни 2013, признаа четвртообвинетиот Томислав Лазаров и петообвинетиот Јордан Ристевски и добија условни казни.
Обвинетите во предметот „Насилство во Центар“ се товарат за поттикнување на насилството што се случи при протестите пред општина Центар во јуни 2013 година.