Поранешниот премиер Никола Груевски се најде на интернет сајтот на Министерството за внатрешни работи за потраги, откако по него од вчера е распишана национална потерница.
-Никола Груевски, од татко Тало и мајка Надежда, роден на 31.08.1970 во Скопје се бара за пронаоѓање и приведување заради извршување на казната затвор во траење од две години за сторено кривично дело- примање награда за противзаконито влијание од чл. 359 ст.2 од КЗ – е тексот со кој е проследена фотографијата.
По налог на Кривичниот суд, МВР попладнево распиша потерница по Никола Груевски кој се бара за отслужување на двегодишната затворска казна за случајот „Тенк“.
-Основниот суд Скопје 1 издаде наредба за приведување на лицето за кое прашувате и на 12 ноември 2018 година во 16.30 часот ја достави до СВР Скопје и побара издавање на потерница. МВР веднаш откако му е доставена постапува по наредбата се вели во информацијата од Кривичен.
Потерницата следи откако во петокот беа направени три обиди од судски курири да му ја врачат одлуката на жалбата на Кривичниот совет за одложување на затворската казна, а и такви обиди беа направени и вчера.
Во вечерните часови, тимови на МВР прво беа во домот на Груевски, на адресата каде и претходно го бараа, а исто така и во подземните гаражи кај седиштето на партијата.
Генералниот секретар на ВМРО ДПМНЕ Игор Јанушев на прес конференција обвини дека партијата е под полициска опсада.
– Членовите на партијата се претресуваат и вознемируваат од страна на полициски службеници. Никогаш во историјата на независна Македонија немало примена на ваква сила врз партија во опозиција. Ова е класична злоупотреба на полицијата во партиско-политички цели. Ова е хајка и линч врз сите кои мислат поинаку – рече Јанушев.
Тој рече дека екс лидерот на партијата и почесен претседател Никола Груевски не е во партиското седиште.
Лидерот на ВМРО ДПМНЕ Христија Мицкоски кој не беше на прес конференцијата, на Фејсбук ја обвини власта за правење на „евтин театар“ и дека неоправдано го посочува прстот во ВМРО-ДПМНЕ дека наводно крие некого.
-Зарем лицето по кого со години водите политичка хајка, фрлате со дрва и камења и кого го третирате за државен непријател сакате да кажете дека не знаете каде се наоѓа – прашува Мицкоски.
Никола Груевски, како поранешниот премиер, согласно законот, има право на физичко обезбедување од Шестата управа во траење од 10 години. Го обезбедуваат шестмина припадници на Одделот за заштита на определни личности и објекти при МВР. Според правни експерти, шестмината полициски службеници не се 24-часовно ангажирани за неговото обезбедување, односно работните задачи ги извршуваат во зависност од потребите на личноста.
Поранешниот премиер нема пасош, а исто така е под мерки на претпазливот, поради судските процеси кои се водат против него. Пасошот му е одземен на 3 јули 2017 година со одлука на Кривичен, а на барање на СЈО за случајот Титаник, за кој ново рочиште е закажани за в среда. Мерката претпазливот ја потврди и Апелацискиот суд на 23 јули и тој еднаш месечно треба да се јавува во Кривичен суд.
Екс премиерот покрај во случајот „Тенк“ во кој е осуден со правосилна пресуда на казна затвор од две години, се јавува како осомничен и во уште неколку случаи отворени од СЈО: Насилство во Центар, Титаник и Траекторија.