Лидерот на ВМРО-ДПМНЕ, Никола Груевски, стана член на Комисијата за уставни прашања. Ова засега е единствената негова активност во работните тела на Собранието на РМ.
Ако го побарате името на пратеникот Груевски на интернет страната на Парламентот, за него нема никаква биографија. Само стара слика од кога бил доста помлад, информација дека е член на Комисијата за уставни прашања и неговиот службен е-маил n.gruevski@sobranie.mk.
Според Деловникот на Собранието, секој пратеник има право да се изјасни во кое работно тело сака да биде член. Комисијата во која членува Груевски не била активна со години, со оглед на надлежноста која ја има. А, тоа е спроведување на Уставот, предлози за изменување и дополнување на Уставот, воспоставување меѓународна соработка за прашања кои се од уставен карактер..
Пратениците имаат обврска да бидат вклучени најмалку во едно од работните тела на Парламентот. Груевски засега е член само на Комисијата за уставни прашања, додека има пратеници кои се членови или заменици на пет комисии.
Никола Груевски во Собранието е дел од првата пратеничка група чиј координатор е Илија Димовски, а заменици – координатори се Невенка Стаменковска и Зеќир Рамличовиќ. Покрај Груевски, дел од „кецот“ на ВМРО-ДПМНЕ се и Трајко Вељаноски и Емил Димитриев.