Во 17-минутно интервју денес на Сител, претседателот на ВМРО-ДПМНЕ Никола Груевски рече дека околу 3.000 волонтери, војска и полиција се на терен, од кои најголем дел се и од ВМРО-ДПМНЕ, активисти и членови кои по повик на партијата и на општинските комитети заминаа таму и секојдневно се таму.

“Практично, ако се земат и огромен број на работници кои освен како волонтери дојдоа и преку одредени јавни претпријатија или на повик на градоначалници, организирани од наши градоначалници, веројатно над 70-80 проценти од луѓето кои во минатите денови помагаа беа наши членови и активисти. Се разбира имаше и други граѓани кои помагаа и на сите би сакал да им упатам јавна благодарност за сето тоа што го правеа во минатите денови и денеска и се надевам во наредните денови”, додаде Груевски.

Според него над 40 екипи на проценители работат на терен секој ден, направени се 1.200 проценки и владата одлично ја организарала работата на терен и прави максимален обид сето тоа побрзо да се заврши.

Груевски не мисли дека градначалникот на Скопје Коце Трајановски треба да даде оставка како што бараат другите партии и граѓански организации. Според него Скопје има градоначалник којшто е човек од народот а неговите претходници беа надмени, арогантни личности умислени сами во себе дека се некои големи величини и оддалечени од народот.

“За првпат Коце Трајановски покажа како треба да се соработува со народот, како треба да се биде на терен со народот, како да се сочувствува со неговите проблеми и на секаков начин да се помага.”