Претседателот на ВМРО ДПМНЕ Никола Груевски во интервју за Хрватската радиотелевизија вели дека со прифаќање на платформата на албанските партии во земјата на некој начин е извршен државен удар.
-Ако по изборите носите платформа која е составена во друга држава, а која се однесува на нашата земја, Македонија, ако таа платформа не ја потврдиле граѓаните на изборите, не се усогласиле во врска со неа, и ако таа платформа не е во согласност со Уставот- тогаш станува збор за уцена. Граѓаните таа платформа не ја познаваат и не гласале за неа на изборите, вели Груевски во интервјуто за ХРТ.
На прашањето, зошто тнр, албанска платформа е спорна за него, имајќи предвид дека и самиот тој слично нешто потпишал во 2008 година, Груевски вели дека тоа било нешто сосема различно.
-Она што денеска се прави оди кон бинационална држава, спротивно е на Уставот на Македонија и ги занемарува другите малцинства. Таквата платформа не е најавена во предизборната кампања и потпишана е во друга држава, под покровителство на премиер на друга држава – Еди Рама, што го потврди и една партија која учествува во неа- Беса, изјави Груевски.
Тој вели дека ВМРО ДПМНЕ на СДСМ и понудила алтернатива за со неговите 51 пратеник и 49-те на СДСМ да имаат 100 пратеници со кои би формирале влада.
-Зоран Заев нека биде премиер, но нека се откаже од платформата составена во Тирана, вели Груевски, додавајќи дека постојат два начини за решавање на кризата и дека тие два начини ВМРО ДПМНЕ ги предложиле.
-Еден од начините е предвремени избори во мај, заедно со локалните, на кои Заев би настапил со палтформата. Вториот начин е Заев да ја прифати понудата на ВМРО ДПМНЕ да се откаже од платформата и да добие малцинска влада со поддршка од ВМРО ДПМНЕ, вели Груевски за ХРТ.
Вчера хрватскиот јавен сервис објави интервју и со лидерот на СДСМ Зоран Заев во кое тој вели дека не очекува насилства и судири.