Хелсиншкиот комитет за човекови права на РМ апелираме до пратениците, особено до владејачкото мнозинство, во најбрз можен рок да ги изгласаат мерките содржани во извештајот на Народниот правобранител каде се наведени препораките на Прибе, откако Собранието вчера не ги прифати конкретни мерки содржани во Извештајот на Народниот правобранител и со тоа одби да ја задолжи Владата да ги подобри состојбите во сферата на човековите права.
-Имплементацијата на препораките од Извештајот на експертската група предводена од Прибе мора да биде главен приоритет на Собранието и Владата за државата да го забрза евроинтегративниот процес, но и поважно, да обезбеди ефикасна заштита на човековите права и слободи на граѓаните.
Во најмала рака е несериозно владејачкото мнозинство да нема обезбедено кворум за изгласување на вакви исклучително важни мерки. Потсетуваме дека пратеничките групи во законодавниот дом мораат да ги имаат како приоритет човековите права и слободи во својата работа и препорачуваме да не дозволуваат технички аспекти како немање доволно присутни пратеници на гласањето да пречат во спроведувањето на главните приоритети на реформскиот процес, се вели во соопштението.