Поранешниот демократски претседателски кандидат Хилари Клинтон ги нарече политиките на администрацијата на претседателот Доналд Трамп опасни и глупави, заклучувајќи дека тој ќе ги направи САД слаби и без пријатели.
Во колумна за „Њујорк тајмс“, таа остро го критикуваше скандалот со групниот разговор на „Сигнал“, како и политиката на Илон Маск за намалување на вработените во федералната администрација.
Клинтон вели дека „ѝ пречи глупоста на новата администрација“.
Таа се осврна на скандалот со групниот разговор во кој советникот за национална безбедност на Трамп, Мајк Волц, по грешка додаде добро познат новинар во група со високи владини претставници, вклучително и секретарот за одбрана Пит Хегсет, кои разменуваа детали за претстојниот напад на милитантната група Хути во Јемен.
Оваа група го вклучуваше и потпретседателот Џеј Ди Венс.
Клинтон рече дека високите функционери на Трамп ги загрозиле американските војници со тоа што споделувале воени планови на апликација за пораки и погрешно вклучиле новинар, додавајќи дека тоа е „глупаво и опасно“.
Според неа, ова е последен во низата неуспеси на новата администрација, што „ја троши силата на Америка и ја загрозува националната безбедност“. Хилари особено го критикуваше распуштањето на Американската агенција за меѓународен развој, УСАИД.
Во опасен и сложен свет, не е доволно да се биде силен. Мора да бидете и мудри. Како државен секретар под претседателот Барак Обама, се залагав за паметно владеење кое ја интегрира цврстата моќ на нашата војска, меката моќ на американската дипломатија, развојната помош, економската сила и културното влијание, напиша таа.
Според неа, сето ова заедно ја прави Америка суперсила. Клинтон оцени дека, наместо тоа, Трамп води ограничена политика што ќе ја направи Америка „слепа, слаба и без пријатели“. Таа заклучи дека се чини дека администрацијата не знае по кој пат да тргне и која е нејзината стратегија.
Трамп се коцка со националната безбедност. Ако вака продолжи, скандалот со групни разговори ќе ни биде најмалата грижа, рече Клинтон.