Хирурзите бараат да работат шест, а не само две сали за операции, за пациентите да можат да добијат интервенции. Директорот на ГОБ „8 Септември“ вели дека кадарот е распределен во ковид – одделенијата. Министерот за здравство, Венко Филипче најави состанок со хирурзите за да се надминат проблемите во болницата.
Хирурзи од градската општа болница „8 Септември“ за в понеделник најавија штрајк, односно прекинување со опеациите, ако директорот Христијан Костов не им создаде услоби за хируршки интервенции кои не се сметаат за итни. Хирурзите во отворено писмо изразуваат незадоволство што дневно во само две сали се вршат операции, наместо во полн капацитет – во шест операциони сали.
– Јасно е дека со настанатата ситуација со пандемијата капацитетите ќе бидат намалени, но ова е под реално можно ниво и резултира со тоа што пациентите кои не се во животозагрозувачка позиција не можат да добијат термин за хируршка интервенција, велат хирурзите во писмото.
За состојбата предупредуваат преку отворено писмо до медиумите, Министерството за здравство и Владата, бидејќи, како што велат, не можат да дојдат до директорот на болницата, Христијан Костов.
– Ние вработените на хируршките одделенија решивме да ви се обратиме преку ова отворено писмо поради целосно исцрпување на можностите да добиеме прием како хируршки колектив и лично да разговараме со директорот Христијан Костовза долготрајниот проблем за функционирањето на хируршките сали во болницата. Бараме да се овозможат услови во болницата да може истата да им пружи здравствена хируршка заштита на поголем број пациенти чии болести не исчезнуваат поради пандемијата. Од страна на вработените беа понудени неколку решенија за реорганизација на работата за да се постигне поголема ефикасност, но истите или не се стигнати до директорот или истиот не ги спроведува ниту предложува други решенија, се наведува во писмото на хирурзите.
Директорот Костов вели дека ја разбира потребата за зголемување на бројот на салите за операции. Според него, сепак тоа сега не е можно, бидејќи дел од персоналот е ангажиран во ковид – одделенијата.
– Согласно бројот на анестезиолози, земајќи го предвид и бројот на оправдано отсутни заради болест, нивниот ангажман во ковид-одделенијата, редуцираниот број хируршки одделенија заради зголемување на капацитетот на одделенија за лекување на ковид-позитивни пациенти во кои е потребен поголем број на медицински персонал, согласно препораките на Министерството за здравство, ставен е акцент на оперативно лекување на пациенти кај кои одложувањето на оперативните интервенции би довело до загрозување на нивниот живот (малигноми и фрактури), се наведува во соопштението на директорот на ГОБ „8 Септември“, Христијан Костов.
Истиот став го дели и министерот за здравство, Венко Филипче. Тој во интервју за Канал 5 вели дека намален е обемот на работа во сите јавни здравствени установи, вклучувајќи ја и ГОБ „8 Септември“, бидејќи голем дел од кадарот ротира за третман на пациенти заразени од Ковид – 19. Филипче рече дека е разговарано со лекарите кои имаат незадоволство поради начинот на работењето.
– Дефинитивно има механизми сето тоа да се измени. Во текот на денешниот ден ги очекувам на состанок за да ги решиме сите проблеми. Верувам дека сето тоа ќе се реши и незадоволството ќе спласне, рече министерот за здравство, Венко Филипче.
Филипче се сретна со хирурзите од „8 Септември“, најдено е привремено решение за операционите сали