Најдено е привремено решение за оперативниот програм за идната недела. Ќе се бара постојано решение за користење на операционите сали во ГОБ „8 Септември“ во време на пандемија.
Министерот за здравство Венко Филипче попладнево оствари средба со претставници на хируршкиот колектив на Градската општа болница „8 Септември“ и со директорот на болницата, Христијан Костов. Средбата доаѓа откако хирурзи од болницата јавно побараа да се вршат операции и за пациентите кои не се итни, односно повторно да работат шест операциони сали, а не само две. Од Министерството за здравство соопштија дека на средбата се разгледани повеќе аспекти на состојбата.
– Во ГОБ 8 Спетември во моментов се лекуваат 100 пациенти со ковид, па оттука и редуцираноста на бројот на хируршки одделенија, но сепак со запазување на итни случаи како малигноми и фрактури. Тие интервенции се одвиваат тековно. За време на средбата се најде привремено решение за оперативниот програм за следната недела, а во тек на престојните денови министерот со лекарите ќе разговараат и за трајно решение за предизвикот, се наведува во соопштението.
Министерството за здравство апелира до граѓаните да се вакцинираат, бидејќи најголем број од пациентите се невакцинирани и тоа сериозно го оптеретува здравствениот систем.