Ќе бидеме партнери со земјоделците и со откупувачите за да можеме да го зајакнеме земјоделството како гранка, бидејќи од тоа зависи и развојот на економијата на нашата држава, порача новиот министер за земјоделство, шумарство и водостопанство Аријанит Хоџа по преземање на должноста од неговиот претходник Трајан Димковски.
„Мило ми е што во Министерството наоѓам тим што завршил и тековно работи на доста добри проекти, но ние можеме да работиме уште повеќе и уште подобро. Наш приоритет е да бидеме партнери со земјоделците и со откупувачите за заеднички да ја развиеме оваа гранка, но воедно ќе работиме и на усогласување на нашето законодавство со европското за да можеме побрзо да ги завршиме пристапните преговори и побрзо да пристапиме до фондовите како сите други европски држави. Преку земјоделството ќе се потрудиме да отвориме самовработување за земјоделците за да можат да имаат достоен живот и нивната иднина да ја градат тука, во нашата држава, и на тој начин да можеме да го искористиме целиот труд на земјоделците за да одиме напред“, рече Хоџа.
МЗШВ, како што истакна, е комплексно Министерство и голем предизвик за него и за партијата што го предложила за да можат да работат во интерес на земјоделците.
Поранешниот министер за земјоделство, шумарство и водостопанство, Трајан Димковски се заблагодари на сите кои, како што рече, во изминатиот период работеле со него и му помогнале да донесат напредок во македонскиот агросектор и на земјоделците за нивната искрена и отворена комуникација.
„Ми беше огромна чест што во овој период од нешто повеќе од една година ја извршував функцијата министер и со мојот тим заеднички придонесеме за развој на овој клучен економски сектор. Во изминатиот период работевме на развојни политики за поставување на земјоделството на вистинскиот пат. Се соочивме со многу предизвици, дел предизвикани од природни појави, дел од политички причини и со еден од најголемите предизвици годинава – вирусот Ковид-19, но заеднички и во координација со земјоделците и стопанствениците во агросекторот секогаш носевме мерки и решенија за справување со секој проблем и за покренување на земјоделството во нагорна линија“, рече Димковски.
Тој потсети на дел од преземените мерки во изминатите три години, преку кои, како што рече, МЗШВ покажа грижа за земјоделството и оти во секоја ситуација е со земјоделците, а воедно и воспостави пракса на навремена и неселективна исплата на субвенциите за земјоделците. За рекордни над 53 проценти, како што посочи, се зголеми и искористеноста на мерките од ИПАРД програмата. Најави дека со помош од Светска банка ќе се градат откупно-дистрибутивни центри за земјоделски производи во скопскиот, во ресенскиот и во струмичкиот регион.