Хојт Брајан Ји, заменик-помошникот државен секретар за Европа и Евроазија во Стејт департментот кој доаѓа во Скопје во понеделник ќе има средби со партиските лидери, но не и со претседателот Ѓорге Иванов, објави Дојче веле повикувајќи се на партиски извори.
Овие извори не ги знаат причините за тоа, но претпоставуваат дека се поврзани со претходниот однос на шефот на државата кон добронамерните сугестии од официјални претставници на земји-стратегиски пријатели на Македонија.
Во меѓувреме, порталот МКД објави дека Кабинетот на претседателот Ѓорге Иванов ја информирал амбасадата на САД во Македонија дека за 1 Мај, шефот на државата веќе има одредена агенда, па нема да може да се сретне со Хојт Ји. Вчера порталот од извори во кабинетот на претседателот објави дека таква средба ќе се одржи.
Минатата недела Стејт Департментот побара итно да се деблокира процесот и најави санкции за политичарите кои ќе го блокираат. Амбасадата на САД потврди за 24 Вести дека Хојт Брајан Ји во понеделник има средба со политичката елита во земјата.
Хојт Брајан Ји даде изјава за Македонија за радиото Гласот на Америка во средината на јануари годинава велејќи дека политичките партии треба да најдат начин да формираат коалициона влада.