Според астрономот и научник Стивен Хокинг, планетата Земја е осудена на пропаст, и доколку во наредните, најмалку 1.000 години, не најдеме ново место за живеење, човештвото нема да постои. Како главни причинители ги наведува климатските промени, нуклеарките, роботите и слично.
Зборувајќи на Универзитетот Оксфорд, Хокинг во својот говор навестил дека единствената шанса за живот како човечки вид е да ја напуштиме Земјата и да воспоставиме колонии на други планети.
„Иако шансите за катастрофа на Земјата во моментов се чинат слаби, тие се зголемуваат со секоја измината година а во наредните 1.000 или 10.000 години тоа ќе се случи“, рекол Хокинг. „До тогаш би требало да се прошириме во Вселената за катастрофата на Земјата да не значи и крај за човештвото“.
НАСА во меѓувреме е во потрага по други планети на кои човечкиот род може да преживее, а како една од можните за кои постојано се зборува во јавноста е Марс.
Сепак во својот говор, “најпаметниот жив човек на Земјата“ како што често го опишуваат неговите колеги, поставил и неколку енигми, за кои вели, луѓето треба да размислуваат.
„Сетете се да гледате во ѕвездите а не под нозете. Пробајте да го разберете она што го гледате и да сфатите како постои универзумот. Бидете љубопитни. Колку и да се чини животот тежок, секогаш може да пробате да направите нешто и да успеете во тоа. Важно е никогаш да не се откажете“, порачал Стивен Хокинг.