Кралот на Холандија Вилем-Александар го осуди пукањето на познатиот истражувачки новинар Питер де Врис, опишувајќи го како напад врз демократијата, кој го шокирал, пренесе Ројтерс.
Де Врис беше застрелан синоќа на улица во Амстердам и се наоѓа во критична ситуација.
„Ова е напад врз новинарството, што е камен-темелник на нашето владеење на правото“, им рече кралот на новинарите за време на државната посета на Германија. „И како такво, тоа е напад врз нашиот уставен поредок“, рече тој.
Холандскиот кралски двор обично не коментира поединечни инциденти, па говорот на Вилем-Александар сведочи за големата популарност и важност на Де Врис.
Нападот врз новинарот предизвика бес и во Европа.
„Ова е злосторство против новинарството и напад на нашите демократски вредности и владеењето на правото“, рече претседателот на Европскиот совет, Шарл Мишел. „Ние ќе продолжиме да ја браниме слободата на медиумите“, додаде тој.
Претседателот на Европскиот парламент Дејвид Сасоли изјави дека медиумите се ‘рбетот на демократијата. „Нападите врз новинари се напади врз сите нас“, рече тој.
Полицијата соопшти дека тројца осомничени биле приведени по нападот, вклучително и можниот стрелец.