Хрватската дизајнерка Ана Барбиќ Катичиќ е идеен творец на новиот трофеј на Светската фудбалска асоцијација (ФИФА) што е наменет за најдобриот играч на годината. За време на промоцијата рече дека при осмислување на пехарот се водела од едноставност и минимализам што треба да ги изразуваат и вистинските вредности на организацијата чиј углед беше нарушен од корупциски скандали во последната година.
На врвот на пехарот има топка што ја отсликува онаа со која се играше финалето на првото Светско првенство во 1930 година меѓу Аргентина и Уругвај. Тежок е 6,4 килограми, го изработи компанијата „Адон Продакшн“ крај Цирих, а честа да го претстави пред јавност ја имаше Звонимир Бобан, заменик на генералниот секретар на ФИФА. Примероци од трофејот ќе бидат доделени на најдобриот фудбалер, најдобрата фудбалерка и најдобрите тренери за 2016 година на свечена церемонија во понеделник, 9 јануари, во Швајцарија.
„Топката на врвот на пехарот ја изразува историјата на фудбалот, но и историјата на ФИФА. Покажува почит кон фудбалската традиција и притоа има модерен изглед. Тој е, навистина, постмодерен трофеј“, рече Бобан.
Педесет отсто од гласовите во изборот на ФИФА ги даваат капитените и селекторите на националните репрезентации, останатите 50 отсто гласови доаѓаат од новинарите и навивачите.