Прашањата кои ги отвори соседна Бугарија со францускиот предлог не треба да бидат дел од преговарачката рамка, а премиерот Димитар Ковачевски да излезе со јасен и дециден став и да се повлече согласноста за прифаќање на предлог, во кој на суптилен начин се вградуваат националистички барања, изјави претседателот на Демократскиот сојуз, Павле Трајанов на прес конференција.
Тој бара од земјите членки на ЕУ кои се блиски пријатели до Македонија како Хрватска, Словенија, Австрија, Чешка, Словачка да гласаат против преговарачката рамка која ги загрозува националните интереси или да стават вето на незиното усвојување.
Трајанов ја повика ЕУ да се држи до основните европски вредности и до
копенхашките критериуми.
Тој повика и граѓаните да го искажат својот став против оваа преговарачка рамка. Одговарајќи на новинарско прашање Трајанов побара детално да се разгледа содржина на предлогот, а за сите евентуални последици ако не се повлече согласноста на барање од македонска страна партијата бара политичка одговорност.
Појаснувајќи го повикот за протест Трајанов објасни дека граѓаните треба да излезат на протест и да протестираат против францускиот предлог, а не против Владата, за да `и покажат на Европската унија дека не се согласуваат со предлог во кој како залог се националните интереси.
– Демократскиот сојуз е против францускиот предлог и ги повикува граѓаните своите ставови да ги искажат преку социјалните мрежи или со мирни протести, за да види Европската унија дека овде има силен граѓански, народен отпор против загрозување на македонскиот национален идентитет. Демократскиот сојуз ќе ја повлече поддршката на Владата доколку се согласи Преговарачката рамка да биде усвоена од Советот на Европската унија, рече Трајанов.