Управата за хидрометеоролошки работи соопшти дека до сабота нашето подрачје ќе биде под влијание на многу топла воздушна маса која ќе предизвика сончево и многу топло време со натпросечни температури на воздухот. Максималните температури долж Повардарието и во јужните делови ќе го надминуваат 40-тиот степен.
Во недела посвежа воздушна маса од север ќе предизвика на повеќе места нестабилно време со поројни врнежи од дожд и појава на грмежи, особено попладне. Во понеделник ќе преовладува променливо и свежо време со локален дожд. Во недела ќе дува умерен, а во понеделник и засилен ветер од северозападен правец, кој ќе предизвика значително опаѓање на температурата.
Од Министерството за здравство препорачуваат да не се излегува на сонце од 11 до 17 часот. Граѓаните да носат лесна и светла облека и да пијат многу течности.