Луна, Христијан, Марија, Ѓорѓи, Севда, Александар, Христина, Светомир, Ива, Калин, Ерато, Никола, Вероника, Данчо, Катерина, Златко, Ивана, Виктор, Верче и Борче се главните херои на изложбата „И јас сум тука“ која својот фокус го насочува кон луѓето со попречености. Изложбата во себе опфаќа дваесет фотопортрети на лица со попречености, меѓу кои лица од различна возраст, различен профил и од различни делови на Македонија. Но, она што сите ги поврзува и обединува во оваа фото-изложба е насмевката која е измамена на нивните лица. Таа насмевка вели – „И јас сум тука“ и повикува на будење. Изложбата е дело на фотографот Тоше Огњанов кој успешно ги „украл“сите насмевки, а надополнета со приказните за животот на овие луѓе раскажани од новинарката Сребра Ѓорѓијевска.
–Многу се радувам што овој проект преку уметноста зборува за овие проблеми, затоа што факт е дека сè повеќе се зборува и сè повеќе проекти има коишто работат со оваа проблематика. Меѓутоа, многу е важно да допреме до децата, до возрасните преку филм, преку театар, преку приказна затоа што сметам дека тоа е најсоодветната форма за да не зборуваме за овие луѓе повеќе со грутка во грлото.“ – вели Сребра Ѓорѓијевска за Нова ТВ.
Фото-изложбата „И јас сум тука“ е дел од проектот „Децата не се раѓаат со предрасуди“, чиј иницијатор е театарот „Глада Худик“ од Худиксвал, Шведска, со поддршка од Шведскиот институт. Изложбата е дел од Фестивалот за литература и илустрација за деца Литера.
Амбасадорката на Шведска во Македонија, Кристин Форсгрен Бенгтсон, во своето обраќање истакна дека подигнувањето на свеста е особено важно кога станува збор за лицата со интелектуална попреченост и дека нема простор за предрасуди, а од особена важност е едукацијата на оваа тема во училиштата.
„Еднаквоста и еднаквите можности за сите се клучните приоритети и вредности на мојата земја, Шведска. Во нашата работа тука, во Северна Македонија, оваа перспектива на правата на луѓето е многу клучна во сè што работиме. Денес сме навистина горди и среќни што можеме да го поддржиме овој проект којшто е насочен кон подигнување на свеста за правата на луѓето со посебни потреби, кој воедно е дел од проектот децата не се раѓаат со предрасуди и сметам дека токму подигнувањето на свеста е важен елемент на можноста да се дејствува против предрасудите.“
Отворањето на изложбата „И јас сум тука“ се случи синоќа во Кинотеката на Македонија, каде беше промовирана и истоимената книга со приказните и фотографиите на 20-те лица со попречености кои беа во фокусот на овој проект. Отворањето на изложбата помина со многу емоции на кои никој од присутните не остана рамнодушен.
Марија Поповска