Сертификатот за прележан Ковид-19, којшто од денеска може да се издава преку Националниот систем Мој Термин, ќе може да го добијат сите лица кои во последните 9 месеци биле позитивни на Sars-Cov-2 и се регистрирани како позитивни случаи.
Тоа значи дека и граѓаните кои досега не примиле вакцина против Ковид-19, а ја прележале болеста најмногу пред 9 месеци, ќе може со овој документ, на кој сега е ставен и QR-кодот, да влезат во Грција или во друга земја којашто го признава овој услов за влез.
На пример, лице од земјава кај коешто на 1. октомври минатата година бил дијагностициран Ковид-19, уште утре ќе може да влезе кај јужниот сосед со овој сертификат, бидејќи тогаш изминуваат девет месеци од позитивниот резултат.
Од Мој Термин за НоваТВ потврдуваат:
– Секоја земја ги определува правилата за влез, а за повеќето важи условот да ја имаат прележано болеста во претходните шест месеци, односно 180 дена, но кај некои важи за прележан Ковид-19 и пред девет месеци. Иако во Грција и досега ги признаваа потврдите што ги издаваа матичните лекари. Но некои земји задолжително бараат ваков сертификат. Ние, еве обезбедивме двојазичен сертификат за прележан Ковид-19 – појаснуваат од Мој Термин.
НоваТВ за ова веќе пишуваше во почетокот на јуни, кога беше најавено дека се чека уште на QR-кодот за да може да се издава ваков документ на граѓаните.
Специјалниот код на Сертификатот при влезот во Грција ќе се скенира за да се потврди валидноста на документот.
Сертификатот може да се преземе кај матичниот лекар или со најава на страницата вакцинација.мк, а е на македонски и англиски јазик. Документот содржи податоци за лицето, тип на тест, дата на тестирање, дата на позитивен резултат, здравствена установа (лабораторија) каде е направено тестирањето, како и QR-код.
Другиот документ, Сертификатот за примени вакцини, граѓаните и досега без проблем го добиваат или од матичните лекари или преку веб-страницата вакцинација.мк.
Инаку, правилата за патување во Грција остануваат непроменети и продолжени до 3 јули, согласно новата министерска одлука „Предуслови за влез во земјата за да се ограничи ширењето на Ковид-19“, што важи и за државјаните на Северна Македонија.
Седум земји-членки на Европска Унија од 1 јуни веќе воведоа систем на сертификат за Ковид-19 за патувања, а во цела ЕУ правилата ќе стапат во сила од јули.
Љубица Балабан