Министерот за надворешни работи Бујар Османи, денес е во посета на Норвешка. Посетата, како што соопшти Министерството е на покана на министерката за надворешни работи на Кралството Норвешка, Аникен Хјуитфелд.
Од содржината на средбата со норвешката колешка се пренесува дека двајцата министри „изразија задоволство што двете држави, во речиси 30-годишната соработка, воспоставија партнерски и пријателски односи, кои се карактеризираат со редовен политички дијалог”. Понатаму се додава и дека Османи изразил благодарност за континуираната поддршка што ја добива нашата земја од Норвешка во изминатите три децении, при што оваа нордиска земја се вбројува меѓу земјите најголеми донатори за спроведување на реформската ЕУ агенда на Северна Македонија”.
„Норвешка отсекогаш била посветен поддржувач на нашиот реформски процес за интеграцијата во НАТО и ЕУ. Благодарни сме за континуираната поддршка што ја давате за унапредување на нашите интегративни процеси во ЕУ“, изјавил министерот Османи во Осло.
Министрите разговарале и за соработката во НАТО, руската инвазија на Украина и за македонското претседавање со ОБСЕ во 2023 година.
Норвешка, која министерот Османи ја избра за своја дипломатска дестинација не е членка на ЕУ. Кралството одржа во два наврати референдуми за членство во ЕУ, во 1972 и во 1994 година, но граѓаните не дадоа поддршка на идејата за пристапување кон европското семејство. Во 2018 година беше спроведено уште едно европско истражување кое заврши со резултат дека 73,6 отсто од Норвежаните би гласале „против“ на референдум за членство во ЕУ.
Во Северна Македонија, пак, централно политичко прашање е зачленување во ЕУ за што се води силна дипломатска офанзива и лобирање меѓу земјите членки на Унијата да помогнат да се надмине бугарската блокада за почеток на преговорите за членство.
Инаку, поради економската неизвесност предизвикана од настаните во Украина, Владата прогласи дека почнува со штедење во државниот апарат вклучително и во министерствата кои се задолжени да приложат список со мерки за намалување на трошоците меѓу другото и во делот на патувања надвор од државата, и големината на делегациите. (С.К.)