„Очекувано и без никакви изненадувања“, вака познавачите на надворешните политики ја толкуваат вчерашната одлука на бугарската делегација да се држи до ветото за Северна Македонија на министерскиот совет за општи работи во Луксембург. Од Центарот за европски стратегии, „Евротинк“ очекуваат некакво поместување во однос на спорот по изборот на нова Влада во Софија.
„Шок и изненадување ќе имаше доколку ветото не се искористеше, така да вчерашните случувања се во рамките на очекувањата. Некое поместување во однос на спорот останува како задача на новата бугарска влада“, изјави за НОВА ТВ извршниот директор на „Евротинк“, Димитар Николовски.
Николовски додава дека ништо не ги спречува властите во земјава засилено да ги продолжат реформските процеси и европеизацијата на општеството, и истовремено, со помош од сојузниците од ЕУ, да продолжат да преговараат со новите бугарски власти.
„Уште еднаш се докажа дека бугарската страна има проблем да ги претстави своите аргументи со цел придобивање на подршка, така да нивниот меѓународен имиџ е значително нарушен. Ова може и да биде еден начин на добивање одредени отстапки од нивна страна, преку некаков “пазар” меѓу ЕУ и Бугарија, но такво нешто не очекувам да се случи во следните неколку месеци“, вели Николовски.
И Симонида Кацарска од Институтот за европска политика вели дека одлуката на Самитот била очекувана бидејќи бугарската техничка влада ја обзнани својата позиција уште минатата недела.
„Словенија како претседавач со Унијата од 1 јули најави дека ќе продолжи да работи врз основа на предлогот од Португалското претседателство, иако во Бугарија нема многу простор за тие дискусии со оглед на тоа дека следуваат повторно парламентарни и претседателски избори. Од наша страна, клучно е да избегнеме да паднеме во вртлог на само-сожалување и да ги мобилизираме внатрешните ресурси во догледно време за спроведување на значајните реформи во областите во кои процесот на ЕУ усогласување ни нуди можности за унапредување на внатрешната состојба“, рече за НОВА ТВ Кацарска.
Министерскиот совет за општи работи, на кој се разговараше и за проширувањето на ЕУ, не даде зелено светло за преговарачката рамка за Република Северна Македонија и за Република Албанија. Бугарскиот диломатски тим одби да го тргне ветото за земјава со образложение дека „ЕУ не ја разбирала длабочината на проблемот помеѓу Скопје и Софија“, посочувајќи притоа дека актуелната техничка влада во Бугарија нема мандат да го реши ова прашање.
Државниот секретар за европски прашања, Ана Паула Закариаш, пак на завршната прес конференција ја повика Словенија, како иден претседавач со Унијата, да ја продолжи дебатата и да го искористи португалскиот предлог кој пред еден месец им беше доставен на С.Македонија и на Бугарија, како можно решение за надминување на спорот меѓу двете земји.
Дека, словенечкото претседателство ќе го преземе португалскиот предлог, вчера во еисијата „Клик Плус“ на ТВ 21 потврди и шефот на македонската дипломатија, Бујар Османи, кој обелодени дека поддршката за нашата земја што ја дале 26 земји членки на Унијата, на вчерашниот состанок во Луксембург, била охрабрувачка.
Биљана Божиновска