Златан Ибрахимовиќ во нему својствен стил го коментира евентуалниот настап со репрезентацијата на Шведска на Светското првенство во Русија. Пред медиумите во САД, каде наодамна потпиша за екипата на Лос Анџелес Галакси, јасно порача дека може да се стави на располагање на селекторот Јане Андерсон, но само доколку самиот сака.
„Секој ден ме бараат од Шведска и ме прашуваат како се чувствувам, што сакам и за што размислувам. Меѓутоа ќе одам чекор по чекор. Ако сум добро и ако бидам во состојба да го работам тоа што можам, тогаш вратата во репрезентацијата е отворена. Таа одлука не зависи од никого освен од мене. Ако сакам да бидам на мундијалот ќе бидам, ако не сакам нема да бидам“, истакна шведскиот напаѓач кој се збогува со репрезентативните настапи во 2016 година.
Шведска обезбеди место на СП 2018 во Русија преку бараж двомеч со Италија. Првиот меч на „Френдс арена“ во Солна, предградие на Стокхолм заврши без голови, а победник немаше ниту во реваншот на Апенините (1:1), но поради постигнатиот гол во гости, Скандинавците се промовираа во мундијалски учесници ова лето.
Ибрахимовиќ, кој одигра 116 меча за Швеѓаните што ги зачини со 62 гола, мака мачеше со повреди во изминатиот период. Сега, се чини, проблемите се надминати, голгетерот е опоравен и направи трансфер во „галакси“. Тоа беше повеќе од доволна причина за гласишта на европскиот север дека би можел да направи кам-бек во „сино-жолтиот“ национален тим на турнирот во Русија каде Шведска ќе игра во група Ф со Германија, со Мексико и со Јужна Кореја.