Членот на Државната изборна комисија од партијата ДПА, Бедредин Ибраими, денеска на прес-конференција не сакаше да го коментира образложението на претседателот Ѓорѓе Иванов за неговата одлука со која ги скрати сите постапки кои се водат против политичари и од власта и од опозицијата, но вели тоа тоа што тој се нашол на списокот е неосновано.
– Се работи за кривична пријава поднесена од СДСМ против мене за моето гласање согласно приговорот поднесен од нивна страна…и согласно Изборниот законик, за моето гласање за поништување на три избирачки места во општина Струмица за време на локалните избори во 2013 година, образложи Ибраими.
Тој вели за оваа кривична пријава дал исказ и пред Основното јавно обвинителство а и пред Специјалното јавно обвинителство, за кое вели го почитува бидејќи е формирано со закон.
Ибраими смета дека неговото помилување е нотирано без потреба бидејќи нема одлука против него.
А Бедредин Ибраими не е единствениот кој смета дека неговото помилување е заведено без потреба. Денеска на одлуката на Претседателот реагираше и поранешниот прв човек на нацијата, Бранко Црвенковски, кој во отворено писмо рече дека не го прифаќа помилувањето на Иванов, бидејќи постапка немало ни против него.
Ѓорѓе Иванов помилувал вкупно 56 мина а дел од нив и по повеќе од десет пати. Рекордер на листата е екс министерот за транспорт и врски Миле Јанакиески со 16 помилувања. Екс министерката за внатрешни работи Гордана Јанкуловска е помилувана дури 13 пати.
Во првата тројка се најде и Сашо Мијалков, за кого Иванов потпишал 6 помилувања. Никола Груевски и Мартин Протоѓер имаат ист број помилувања, пет, веднаш зад нив е секретарот на владата Кирил Божиновски со четири, директорот на петтата управа Горан Грујевски со три помилувања. последни на листата со повеќе од едно помилување се претседателката на советот на Град Скопје, Ирена Мишева, поранешниот директор на бирото за јавна безбедност Љупчо Тодоровски Радникот, претседателот на СДСМ Зоран Заев и поранешниот разузнавач Зоран Верушевски.
Меѓу звучните имиња на сегашни и поранешни функционери се најдоа и претседателот на Собранието, Трајко Вељановски, потоа градоначалниците на Скопје, Коце Трајановски, на Битола, Владимир Талевски, на Пустец, Едмон Темелко и екс-градоначалникот на Центар, Владимир Тодоровиќ.
Тројцата специјални обвинители Фатиме Фетаи, Лиле Стефанова, и Гаврил Бубевски исто така се наоѓаат на листата помилувани меѓу другите.