Согласно новиот алгоритам „оздравени“ се 13.041 лице во болнички услови или на домашно лекување, а просечно 30,3 отсто од тестираните се позитивни, или секој трет
За речиси 40 отсто е зголемен бројот на починати од ковид-19 во периодот од 24 до 30 јануари во однос на претходната недела – пријавени се 148 смртни случаи во 26 градови. Најголем број од починатите, 132 лица, биле постари од 60 години, 12 лица биле на возраст од 50 до 59 години, а по двајца имале меѓу 40 и 49 години и 20 и 29 години, покажува најновиот извештај на Институтот за јавно здравје (ИЈЗ).
Досега во лабораторијата за вирусологија при ИЈЗ се детектирани 255 пациенти позитивни на Омикрон варијантата (B1.1.529).
Повеќе позитивни – просечно 30,3 отсто, ама помалку заболени
Тестирани се вкупно 38.518 материјали во лабораториите за присуство на SARS-CoV-2, со намалување од 2,0 % во однос на минатата недела. Регистрирани сe 11.916 нови позитивни случаи од 35 градови во државата, со зголемување од 2,7% во однос на минатата недела (n=11.598).
Процентот на позитивност се движи од 22,5% до 35,8%, просечно 30,3%. Најголем дел од регистрираните случаи се од Скопје (n=6.033; 50,6%), а највисока неделна инциденца е регистрирана во Кавадарци – 1.420,7 на 100.000 лица.
Регистрирани се заболени лица во сите возрасни групи. Најзастапени се возрасните групи на лица на возраст над 60г (n=2.636, 22,1%) и 30-39г (n=2.635, 22,1%). Најмал број е регистриран кај возрасната група од 0-9г (n=257; 2,2%). Се забележува намалување на бројот на заболени кај скоро сите возрасни групи, со најзабележително намалување од 11,0% кај возрасната група од 10-19г, додека зголемување се забележува кај возрасните групи од 50-59г со 3,3% и над 60г со 25,3% зголемување во однос на претходната недела.
Со ковид-19 повеќе се заразиле жени отколку мажи
Во однос на дистрибуцијата по пол, пријавени се 6.359 (53,4%) лица од женски и 5.557 (46,6%) од машки пол.
Согласно новиот алгоритам за оздравување во текот на минатата недела со статус „оздравени“ се стекнало 13.041 лице во хоспитализирани услови или на домашно лекување. Во текот на минатата недела вкупно се пријавени 1.558 реинфекции, скоро идентично во однос на претходната недела.
Од 148 смртни случаи во текот на изминатата недела, најголем дел – 48, се од Скопје.
(Љ.Б.)