Денеска од 17 часот пред владата на Македонија се одржа собирот за Заедничка Македонија или, како што организаторите го нарекуваат четврт Илинден.
Илјадници граѓани велат дека тука се да покажат дека се против она што, според нив, политичарите го договориле за Македонија. Тврдат дека ова не е протест, туку мирен собир на којшто сакаат да покажат дека се против двојазичност и федерализација на државата.
Од владата, граѓаните протестот го продолжија пред Народната канцеларија на претседателот Ѓорге Иванов, па потоа пред Собранието.
Еден од иницијторите за денешниот собир, Богдан Илиевски пред Собранието рече дека се собрале за да покажат како се сака татковината.
„Сакаат разнебитување, ние сакаме заедничка татковина. Сакаат да ја разделат црвената и жолтата боја од знамето. Тоа нема да им го дозволиме“, рече Илиевски.
Тој ги повика сите граѓани и организации кои сакаат да се вклучат во иницијативата.
„Продолжуваме утре во исто време“, рече Илиевски.
На собирот немаше партиски обележја, а дел од присутните пристигнуваа во мали групи, но дел доаѓаа во големи групи. Може да се забележат раководни лица од институции, и лекари и културни работници, но немаше никој од високото раководство на ВМРО-ДПМНЕ.
На само неколку стотина метри од владата, каде што започна „непартискиот собир“, против платформата на Албанските партии, неколку десетици граѓани потпрени на ѕидот пред партискиот штаб на ВМРО-ДПМНЕ кој се наоѓа во близина на зградата на владата се потпишуваа на листови на кои се напишани имиња и презимиња.