Ковид-19 покоси цело семејство во тетовско. Мајка, татко и ќерка починаа како последица на коронавирусот. Тројцата не побарале лекарска помош иако, и онака, биле во тешка здравствена состојба, односно имале коморбидитети. Се претпоставува дека семејството се заразило на некоја свадба или при групирање за некоја друга семејна прослава.
Минатата недела во домашни услови во тетовско починаа три лица од исто семејство. Ќерката била на возраст од 36 години и имала тешки гинеколошки проблеми. Нејзините родители, пак, исто така, се бореле со тешка форма на болести. Таткото имал карцином, а мајката била со кардиомиопатија. Но и покрај тоа, не се обратиле за медицинска помош во болница. Во семејството немало други заболени лица, изјави доктор Миранда Пајазити од ковид-центарот при тетовскиот Клинички центар.
Докторка Пајазити нагласи дека досега се соочиле со многу случаи на заболени лица од исто семејство кои пројавувале поблаги симптоми на ковид-19 и се лекувале во домашни услови. Таа истовремено апелира до сите лица да се јават на лекар, веднаш штом почувствуваат некој од симптомите на коронавирусот. Свеста, според неа, расте, но недоволно, па затоа и се случуваат вакви трагедии.
„Има пациенти кои, за жал, не одат на болничко лекување и доаѓаат во крајна фаза. Малку, сепак, е подобрена состојбата во тој поглед, но кога еден член на семејство е позитивен, тој мора да се изолира, а другите да се тестираат, порачува докторка Пајазити.