„Победа„, „Победа“! Еве подготвени сме да навиваме за нашите фудбалери и да ги бодриме утревечер директно од трибините на стадионот во Букурешт. Поаѓаме сега во 18.30 часот од Скопје, сите сме весели и расположени за скандирање „Напред, Македонија!“, а широко ќе ги развиориме и нашите знамиња на стадионот , изјави денеска за НоваТВ Велимир Тричковски, физиотерапевт на Клиниката за инфективни болести и фебрилни состојби во Скопје, пред поаѓањето за Романија на Европското првенство ЕУРО 2020. Тој е еден од 20ина вработени од Инфективната клиника, коишто ќе утревечер бидат меѓу најгласните навивачи за нашата репрезентација.

Фудбалската федерација на Македонија им подари 20 билети на вработените од оваа клиника за и тие да може да присуствуваат на првиот натпревар којшто македонските фудбалери утре во 18 часот го играат во Националната арена во Букурешт против репрезентацијата на Австрија.

– Радосни сме многу што токму тие што цела година нѐ бодреа нас, вработените на Клиниката за инфективни болести и кога нам ни беше најтешко, тие ни дадоа поддршка да истраеме во битката против коронавирусот што ја водиме повеќе од една година за нашите пациенти. Сега, нашата голема поддршка ние ќе им ја дадеме на нашите фудбалери и тоа на првиот меч и веруваме дека ќе им бидеме среќа за победа! Благодарни сме им на ФФМ што ни подарија билети за натпреварот, но и на Телеком коишто веднаш нѐ контактираа и ни понудија организиран превоз со автобус до Букурешт и нѐ враќаат во Скопје по натпреварот, вели Тричковски.

Во навивачката група од Инфективна клиника се и специјалисти инфектолози, специјализанти, медицински сестри, но и болничари, лаборанти и физиотерапевт.

– Едвај чекаме да скандираме и навиваме за Македонија! Ќе вежбаме уште попат, во автобусот – порачаа вработените од  Инфективна пред да тргнат за Букурешт, а среќен пат и да ѝдонесат победа на нашата репрезентација им посака и  главната медицинска сестра на клиниката, Габриела, којашто попладнево ги испрати колегите .

Љубица Балабан