Судијата од Основниот кривичен суд Скопје, Владимир Туфегџиќ поднесе иницијатива до надлежните институции за измени и дополнување на Законот за кривична постапка (ЗКП), со цел да се спречи непотребното одолговлекување на судските рочишта при промена на член на судечкиот совет, при што некои од случаите се враќаат и на почеток.
Со оваа иницијатива судиите на овој Суд, како што стои во соопштението, сакаат да предложат измени со кои доследно ќе се почитуваат правата на странките во постапката, ефикасност во постапувањето, еднаквост на оружјата и почитување на правото за судење во разумен рок.
Судијата Туфегџиќ во иницијатива ја нагласува потребата од измени и дополнувања на членот 371 од ЗКП, во делот на продолжување на главната расправа, поради измена на составот на советот или судија поединец. Сегашното законско решение наметнува обврска советот да може да одлучи определени сведоци и вештаци да не се сослушуваат повторно, туку да се прочитаат нивните искази внесени во записниците од поранешната главна расправа доколку постои согласност на странките.
„Имајќи ја предвид досегашната судска пракса, во смисла на примена на законските одредби од ЗКП, а кои се однесуваат на повторен почеток на главна расправа во случај на измена на составот на судечкиот совет, сметам дека Основниот кривичен суд треба да поднесе иницијатива за измена и дополнување на Законот за кривична постапка. Досегашната судска пракса покажа дека при промена на составот на судечкиот совет, продолжувањето на веќе започната кривична постапка во целост зависи од согласноста на странките, во однос на веќе изведените докази“, стои во иницијативата на судијата Туфегџиќ.
Во досегашното постапување во кривичните предмети пред Основниот кривичен суд, како што е наведено, клучен фактор за одолговлекувањето на започнатите кривични постапки е токму изричната законска одредба од член 371 од ЗКП, која наметнува обврска на судечкиот совет да бара согласност од странките да се прочитаат веќе изведените материјални и вербални докази. Доколку таква согласност не биде дадена од странките во кривичната постапка, судечкиот совет во изменет состав мора одново да ги изведе сите докази.
Во иницијативата се предлага при промена на составот на судечкиот совет, започнатата кривична постапка непречено да продолжи откако на новите членови на постојниот судечки совет на затворена седница ќе им бидат презентирани дотогаш изведените докази во текот на кривичната постапка. Притоа да се избришат законските решенија кои предвидуваат изрична согласност на странките во кривичната постапка по однос на повторното изведување на веќе изведените докази.
„Во ваква правна ситуација, од процесен аспект, затворената седница за запознавање на новите членови на судечкиот совет со дотогаш изведените докази во текот на кривичната постапка, би ја закажал претседателот на судечкиот совет или член на судечкиот совет, а доколку дојде до промена и на претседателот на судечкиот совет и член на судечкиот совет, тогаш затворена седница би иницирал претседателот на Кривичниот суд“, се наведува во иницијативата.
Според судијата Туфегџиќ, со имплементација на вакви измени во Законот за кривичната постапка, би се запазило начелото на економичност и ефикасност во судската постапка и воедно би се оневозможило злоупотреба која како крајна цел има одолговлекување на започнатите судски постапки особено во сложени кривични предмети со голем број на материјални и вербални докази.
Судијата во иницијативата укажува дека ваквите промени што тој ги предлага се на линија на арбитрарната улога на судечкиот совет во кривичната постапка, која врз основа на изведените докази предложени од странките во кривичната постапка треба да изгради сопствено мислење во однос на кривичното дело кое на обвинетите им се става на товар.