Екипажот на украинскиот „боинг 737“ кој вчераутро се урна во Иран воопшто не побарал помош од контролата на летање и се обидел да се врати на аеродромот во Техеран пред да се урне. Иранските власти се сомневаат во технички проблем на леталото и тврдат дека се случил неочекуван проблем по полетувањето од аеродромот „Имам Хомеини“ што според нив е причина за смртта на сите 176 патници и членови на екипажот.
Иранскиот министер за транспорт Мохамед Еслами изјави дека во прашање е технички дефект и ги отфрли шпекулациите за нешто сомнително во несреќата.
„Авионот се запалил поради технички дефект кој довел до несреќата“, тврди Еслами.
Очевидци, вклучително и екипаж на друг авион кој минувал во близина, велат дека од авионот се гледале пламени јазици. Падот предизвикал голема експлозија затоа што бил полн со гориво за долгиот лет до Киев, Украина. Иранските власти ги пронајдоа двете „црни кутии“, кои содржат податоци и снимки од комуникациите во кокпитот на леталото, иако тие биле делумно оштетени.
На летот до Украина се превезувале 167 патници и девет членови на екипажот од неколку држави, меѓу нив 82 Иранци, најмалку 63 Канаѓани и 11 Украинци. Голем дел од патниците биле студенти од универзитети во Канада кои се враќале во Торонто преку Киев.
Канадскиот премиер Џастин Трудо изјави дека 138 патници требало да се вратат во неговата земја. Знамето над парламентот во Отава е спуштено на половина копје, а Трудо најави дека несреќата ќе се истражи до крај.
Украинските власти првично се согласија со своите ирански колеги дека авионот паднал поради механички проблем, но подоцна го повлекоа тој став и одбија да го објаснат тоа, се додека трае истрагата. Иако причините за несреќата сè уште не се познати, новата трагедија може дополнително да го наруши имиџот на „Боинг“ кој веќе се соочи со жестоки критики поради проблеми со поновиот модел на „737“, откако две летала од најновиот модел имаа несреќи.
