Ураганот Ирма стигна до јужниот дел на Флорида и веќе ги погоди јужните острови, а наскоро треба да пристигне и на југозападниот дел од копното. Ирма напуштајќи ја Куба доби на сила и сега повторно е ураган од 4-та категорија. Последните информации што ги пренесуваат американските медиуми е дека се движи со брзина од 130 километри на час.
Најмалку 1 милион луѓе ги напуштија своите домови во Флорида, додека останатите се сместени во 260 импровизирани засолништа.
Мајами е речиси испразнет, прогласен е полициски час, пренесуваат медиумите. Околу 500.000 луѓе во Флорида се без електрична енергија, а апелите за спас од најкатастрофалната бура што ја погодила оваа сојузна држава не стивнуваат.
„Одете си без да се грижите за материјалните добра, нив ќе ги замениме, вашите животи не“, напиша на Твитер претседателот на САД, Доналд Трамп.
„Оди од лошо во полошо“, вели Џон Хајнс, жител на Ки Вест во Флорида, кој не го напуштил својот дом.
„Внатрешните врати веќе почнаа да тропаат, звучи како некој постојано да ми тропа на надворешната врата. Ветровите доаѓаат, а ова ќе биде се полошо“, дополнува тој.
Ирма со својата разорна моќ уништи голем дел од островите на Карибите и Куба а пријавени се над 20 случаи на смрт.
Од Македонската амбасада во Вашингтон соопштија дека досега ниеден македонски државјанин не побарал помош.