Бугарски медиуми објавија дека во најновиот извештај на Европскиот парламент за Северна Македонија се повикува на обновување на работата на заедничките механизми меѓу Скопје и Софија и на спроведување на Договорот за пријателство, добрососедство и соработка.
Според објавите во бугарските медиуми, документот ја нагласува важноста на имплементацијата на меѓународните договори во дух на добра волја, вклучително и Преспанскиот договор и Договорот за добрососедство со Бугарија.
Во извештајот, како што пренесува „Дир.бг“, се изразува загриженост што последната седница на Заедничката меѓувладина комисија, воспоставена согласно член 12 од Договорот со Бугарија, се одржала на 17 јули 2022 година и оттогаш не била организирана нова.
Европскиот парламент, според текстот, ги повикува владите на Северна Македонија и Бугарија што поскоро да организираат трета седница на Заедничката меѓувладина комисија со цел да се постигне напредок во спроведувањето на Договорот и неговите протоколи.
Во документот се повикува и на обновување на работата на Заедничката мултидисциплинарна експертска комисија за историски и образовни прашања, која подолго време нема постигнато позначаен напредок.
Бугарските медиуми наведуваат дека извештајот признава постоење различни толкувања за историските карактеристики на македонското општество, но инсистира тие прашања да се разгледуваат врз основа на објективни, автентични и научно поткрепени историски извори и документи.
Во извештајот се изразува и загриженост за, како што се наведува, зајакнати врски меѓу Северна Македонија и Србија, како и за кинеското и руското влијание во регионот.
Сè уште не е закажан датум за расправа и гласање на извештајот на пленарна седница на Европскиот парламент, но според бугарските медиуми, тоа се очекува на 6 јули.
Извор: Инбокс7.мк