Рома, се чини, ја пополни тренерската позиција за наредната сезона. Според италијанките медиуми, кормилото на „волчицата“ во летниот период ќе биде доверено на Џанпјеро Гасперини, актуелниот тренер на Аталанта. Двете страни, наводно, постигнале договор за соработка за наредните три години со плата од 2,5 милиони евра по сезона плус бонуси.
Италијанскииот менаџер во минатото заврши одлична работа во Бергамо што кулминира со пласман во финалето во Купот на Италија во оваа сезона. Лацио ја освои титулата по триумфот со 2:0 на „Олимпико“, но Аталанта е во позиција да обезбеди и учество во Лигата на шампиони. На две кола до крај на сезоната во Серија А, екипата е четврта на табелата со 65 бода, еден помалку од Интер на третото место. Во недела ја очекува гостување кај Јувентус, а последниот настап ќе биде на домашен терен против Сасуоло.
Рома со Гасперини сака да започне нова ера и уште повеќе да се посвети на младите играчи. Оваа сезона „волчицата“ ја почна со Еузебио ди Франческо кој пролетва доби отказ поради променливите игри и резултати во калчолигата и како привремено решение беше назначен Клаудио Раниери. Римјаните го завршија настапот во Лигата на шампиони во осминафиналето со елиминација од Порто, а по завршување на тековното првенство во Италија ќе останат и без Даниеле де Роси кој нема да добие нов договор со клубот.