Претседателот на Република Македонија Ѓорге Иванов кој вчера наутро се вратил од посетата на Турција не е информиран за исходот од последната средба на министерот за надворешни работи на Република Македонија Никола Димитров и министерот за надворешни работи на Република Грција Никос Коѕиас со амбасадорот Метју Нимиц.
Од Кабинетот на Претседателот на Република Македонија информиираат дека на 29 март, а по најавената можност за одржување на консултативна средба на државно-политичкиот врв за 2 април 2018 година, преку допис побара од Министерството за надворешни работи писмено да бидат доставени:
– Извештај од билатералната средба на Претседателот на Владата на Република Македонија Зоран Заев и Претседателот на Владата на Република Грција Алексис Ципрас, одржана на 24 јануари 2018 година за време на Светскиот економски форум во Давос, на која се повикуваат двете страни како рамка за водење на разговорите,
– Нацрт-текстот на билатералната спогодба за надминување на разликата околу името, доставен од Министерството за надворешни работи на Република Грција, и нацрт-текстот на билатералната спогодба доставена од македонска страна на 20 март 2018 година, вклучувајќи и информација за тимот што од македонска страна учествувал во изготвувањето на документот,
– Извештаи од билатералните разговори на министерот за надворешни работи на Република Македонија, Никола Димитров и министерот за надворешни работи на Република Грција, Никос Коѕиас.
Претседателот Иванов смета дека е неопходно да биде информирана и македонската јавност за текот на разговорите во процесот за надминување на разликата околу името.
Лидерска средба за разговорите за спорот за името, вчера побараа и од ВМРО ДПМНЕ. Премиерот Заев денеска соопшти дека лидерска средба ќе има кога сите политички учесници ќе бидат во земјава – тој напомена дека Иванов е во Турција,а министерот за надворешни работи од денеска е во посета на Холандија.
„Денеска подготвен сум да одржам состанок со шефот на опозицијата, доколку тој заклучи дека треба да го има. Тие побараа лидерска средба, а како ќе одлучат јас им стојам на располагање, да ги информирам пред да одиме на средбата во Софија, а, секако, подготвен сум и по Самитот на ЕУ за Западен Балкан во Софија да ја свикам лидерската средба, кога на неа би биле сите присутни. Но, повикот е на шефот на опозицијата, а јас стојам на располагање во координација со него, така и да ја организираме средбата“, нагласи Заев.