Годинава што одминува сакаме што побргу да ја заборавиме. Во неа се соочивме со многу кризи и предизвици.
Редно е да извлечеме поуки од сето тоа и да излеземе посилни, помудри и поодговорни. Да не дозволиме се што беше негативно да ни се повтори, рече во својата новогодишна честитка до граѓаните претседателот на државата Ѓорѓе Иванов.
-Новата 2017-та година кај секој од нас буди нови очекувања, нови надежи, нови желби.
Во овие моменти кога ја чувствуваме моќта на надежта и на радоста, се навраќаме на основните човечки вредности, на потребата да бидеме солидарни, хумани, праведни, рече во честитката Иванов.
Претходно Иванов во своето годишно обраќање рече дека политичарите оваа година создале амбиент на страв и на неизвесност за граѓанит, а личната нетрпеливост меѓу политичките лидери и елити се прелеала на целото македонско општество. Тој рече дека Специјалното јавно обвинителство е селективно и политизирано обвинителство кое наместо инструмент за правда, се сведе на инструмент за уцена на политичките противници, а упати и критика до Брисел и ЕУ,за кои рече дека се причина за политичката криза.